中環出更：吳傑莊搵Wonder Girls省招牌
韓國人氣女子組合Wonder Girls尋日訪港，為下月十七日舉行嘅演唱會做宣傳，旋風橫掃九龍同新界，事關金至尊珠寶同華人置業旗下嘅商場The ONE係贊助商，所以五位韓國靚女先去荃灣如心廣場嘅金至尊分店，跟住再趕去尖沙咀The ONE同粉絲玩過。金至尊副董事長、「千億新抱」徐子淇父親徐傳順同華置董事劉鳴煒都分別現身撐場。不過講到今次大騷嘅幕後功臣，不得不提靠IT界創業成功而嶄露頭角嘅全國青聯常委吳傑莊（Johnny）。
Johnny係專研人面識別技術嘅鈦極科技創辦人，雖然只有三十幾歲，但公司已經喺美國上市，係年輕人靠食腦成功嘅典範。Johnny掘得人生第一桶金後，事業發展更順利，近年同金至尊拍住上，出任金至尊數碼科技行政總裁，啱啱宣布成立嘅網上銷售平台「淘至尊」，佢佔兩成股權，金至尊嘅母公司香港資源佔八成，又係一間同系姐妹公司。
今次演唱會係Johnny事業嘅轉捩點，事關佢一腳踏入娛樂圈，創辦咗Sparkling娛樂，頭炮就係今次Wonder Girls香港演唱會。呢個係省靚招牌之作，一個招牌係Sparkling，另一個係提供全天候銷售服務嘅淘至尊。Johnny同卓妮講，Sparkling正在洽談幾位藝人，遲啲仲會簽藝人添。至於淘至尊除咗銷售金至尊嘅靚鑽、金器之外，如果有靚嘢都會擺上網賣，好似今次Wonder Girls最靚嘅一千二百八十蚊門票，就喺淘至尊網上有售。Johnny話市場反應好，貴飛售罄；雖然演唱會只得一場，但已封蝕本門。
徐傳順證子淇未有喜
Wonder Girls呢隊韓國女子組合，近年橫掃亞洲，成為年輕一代新偶像，最hit嗰隻《No Body》，好多年輕人琅琅上口，佢哋其中一個成員惠林，仲係香港人。
徐傳順身為金至尊副董事長，尋日都瞓身撐Johnny，親自接待Wonder Girls。徐生到時會同太太入場聽演唱會，但囡囡徐子淇就唔去嘞。卓妮順便八吓徐子淇係咪有喜，但徐生重複囡囡見咗報嘅回應，即係未有！夜晚劉鳴煒都去咗The ONE主持大局。
卓妮