中環出更：孫啟烈買床單畀新抱發辦
想甜睡一覺，除咗一張軟硬適中嘅床褥，配埋一套雅致床上用品，發個好夢話咁易。講到心水床單，工業總會主席孫啟烈就鍾意「雅芳婷」，仲自爆佢公子當年結婚，都係冚雅芳婷龍鳳被。
愛簡潔怕「娘」
雅芳婷早前推出新床上用品系列，孫啟烈專登撐場，見到新床單，忍唔住摸吓質料如何，十足半個專家。不過孫家屋企嘅床單，原來另有「買手」，就係孫啟烈嘅新抱喇。孫生話，新抱入門後，首先要持家有道，所以揀床單嘅重任，就交由佢發辦。以呢招特訓新抱，聽落幾有心思。好彩呢位老爺唔難服侍，喜歡款式簡潔嘅床單，最怕係花花碌碌，感覺「好娘」，新抱知佢心意，氹得老爺好開心。
雅芳婷如今已發展為中國及香港最大型家紡企業之一，七十年代初期由經營棉花枕頭嘅山寨廠起家，至今銷售版圖已擴至中國、東南亞及歐美等地，喺香港更是無人不曉嘅床上用品品牌。
卓妮