政情：田少擬再戰新界東
原自由黨中常委田北辰退黨，黨內直選領軍人物又少一個，直接波及該黨嘅直選布陣。據悉，自由黨前主席田北俊眼見黨內動盪不穩，已經做定準備全面復出，而自由黨高層亦正醞釀，部署田少再度領軍直選新界東，以重振自由黨聲威。田少喺政壇離場休息咗兩年，終於重出江湖，所以田二少今次出走，對自由黨同田少田北俊嚟講，可能都係塞翁失馬，焉知非福。
自由黨正值多事之秋，素來係黨內精神領袖嘅田少，傳出重掌自由黨。政壇眾所周知，田少○八年新界東選舉失利而辭任主席以嚟，一直以「元老」身份領導自由黨，田二少退黨，田少焗住走出前台，只係轉用另一個身份帶領自由黨。反而自由黨高層部署田少出戰新界東，就會全盤左右該黨直選布陣。
劉健儀哪吒讓路
正積極考慮由航運交通界轉戰直選嘅自由黨主席劉健儀（Miriam），曾考慮落戶安全系數最高嘅新界東，但遇上田二少離巢，田少全面復出坐鎮，若田少要喺跌倒嘅新界東企番起身，Miriam將毫不猶豫讓路，最新發展係Miriam已將直選目光再次投向槍林彈雨嘅香港島。至於近年備受自由黨力捧、第二梯隊中最具實力嘅西貢委任區議員「哪吒」方國珊，一直視田少為「師傅」，田少再戰新界東，相信哪吒亦願意繼續屈居名單第二，為田少抬轎助選。
尋日問哪吒，點睇田少再戰新界東傳聞。佢答得好得體，話距離選舉仲有兩年，現時談論黨內直選布陣，言之過早，強調目前最緊要做好地區工作，省靚自由黨招牌。
或增設黨魁職位
對田少或重掌自由黨，Miriam尋日話，早前研究為田二少「度身訂造」副主席新職位時，考慮過增設黨魁職位，只係當時大家覺得手續「太繁複」而作罷；現時田二少退黨，自由黨聽日起一連兩個周日開集思會，探討修改黨章，以配合新形勢，好大機會為田少做黨魁鋪路。