中環出更：星爺揀女主角要樣靚身材正

中聯辦主任彭清華、外交部副部長張志軍、外交部駐港特派員呂新華及煲呔曾等主禮嘉賓畀足面撐場。不過，一如卓妮事先預料，全日人氣最旺嘅嘉賓梗係「星爺」周星馳，佢仲現場自爆揀女主角嘅心得，大家估吓係咩？咪就係樣靚、身材正囉！

未講星爺之前，卓妮要報吓喜先。事關今次出錢出力嘅菁英會名譽主席信和集團太子爺黃永光，全日愈忙愈開心，原來佢嘅寶貝兒子黃家寶今日滿一周歲，卓妮問佢點慶祝，佢話自己同太太奉行低調，只會喺屋企食餐飯就算啦！佢驚呢個話題會搶咗大會嘅風頭，唔係好肯講，卓妮都係點到即止，言歸正傳。

為博鰲青年論壇主講

卓妮真係要讚吓菁英會班骨幹，今次請到星爺出場，令整個論壇生猛晒，淨係追蹤星爺而來嘅傳媒就超過半百。星爺一入場，台下掌聲雷動，連主持人都感嘆掌聲多過特首添！跟住台上四位嘉賓輪住講嘢，未到星爺已有台下聽眾急不及待遞紙條發問。雖然星爺講Talk好嚴肅，但台下嘉賓有備而來，好抵死問星爺點樣做好「風險投資」，事關佢每套新戲都起用新面孔嘅女主角，但套套戲都咁賣座。

呢位鬼馬嘅聽眾言下之意，係星爺發掘嘅女主角經常成為緋聞女友，難怪話音未落，台下已笑成一片。由於大會唔畀星爺用廣東話回答，所以佢用普通話回答：「選女演員最重要是靚女，還有身材要好！」自己講完都笑埋一份。

大家咁享受論壇，要知係菁英會一班兄弟姊妹辛苦嘅結果。菁英會主席白富鴻話畀卓妮知，呢兩個星期佢忙到食不知味；副主席莊士集團太子爺莊家彬都忙住招呼遠道而來嘅貴賓，連自己工作都兼顧唔到，尋日仲施展分身術，下午三時靜雞雞溜返公司開董事會，一小時後又重返現場。立法會議員梁君彥囝囝菁英會副主席梁宏正都認真唔話得，自己瞓身幫手但不忘讚吓手足，話大家喺開幕前一晚都忙到凌晨至走。

菁英會一眾女將齊撐場。左起：栗潛心、董喆、張雅麗、江欣庭。 （楊歡成攝）	外交部副部長張志軍（前）擔任主講嘉賓，外交部駐港特派員呂新華（右）全程陪同。 （蘇文傑攝）	大會圓滿落幕，菁英會主席白富鴻（前排左三）及創會會長施榮忻（前排右三）帶領一班成員，與博鰲論壇秘書長周文重（前排中）齊齊影張大合照。

菁英會獲周文重激讚

難怪博鰲論壇秘書長周文重喺閉幕式上，話要高度評價菁英會嘅成果，仲話希望明年喺度重聚，相信菁英會班成員飲得杯落啦！

卓妮