中環出更：IQ博士與台灣淵源深

任「神仙‧老虎‧狗」榮譽會長

IQ博士同卓妮講，佢同台灣好有淵源，事關佢已故父親黃克立係抗戰後嘅第一任台中市長，所以佢同台灣關係好好，有好多台灣朋友，好似同「神仙‧老虎‧狗」創會會長盧文韻（Jenny）就相識幾十年。IQ博士又話，自己生肖屬老虎，係呢個組織嘅榮譽會長。卓妮記得，今年佢新買嘅豪華遊艇都係台灣製造，果然對台灣好有感情喎。

當晚許漢忠都喺度，佢娶咗個台灣太太，眾人稱呼佢係台灣女婿。原來佢生肖都屬虎，襯晒呢個歡樂組織嘅名字。許漢忠笑稱，同IQ博士相比，佢係細兩個圈嘅老虎仔喎，哈哈！卓妮見佢哋關係好融洽，成晚笑聲不斷。好似Jenny一見到IQ博士，就問佢點解唔帶太太嚟畀大家睇吓，點知IQ博士好幽默咁回答：「我想睇吓佢都好難！」逗得現場賓客開懷大笑。

講起「神仙‧老虎‧狗」改名嘅典故，原來都幾搞笑。現任會長亞洲聯合財務公司老闆長原彰弘話，約十年前，佢哋一班志同道合嘅台商同香港商界朋友經常聚會，大家輪流作東，逢親兩岸有重要人物訪港，佢哋就號召大家聚會。當時好多成員都屬狗或老虎，好似派駐香港嘅中華旅行社前總經理鄭安國就係屬狗，繼任人張良任又係屬狗，所以一於改咗個咁盞鬼嘅名。佢仲話，如果生肖唔係老虎或狗者，就係神仙啦！依家好多企業家第二代加入，好似福建社團頭領施子清囝囝施榮忻都係成員之一。

日本救心香港代理泰山企業老闆林添茂（右），係台灣社團領袖，當晚又點少得佢。左為光華新聞文化中心主任羅智成。

好易通電腦辭典賣到成行成市，老闆錢立祐（後）係台商喺香港發展嘅成功典範，佢同太太有影皆雙。

卓妮