政情：張宇人代拉頭馬開心吓
自由黨近日多風雨，黨核心自然個個心情煩躁，不過副主席張宇人（Tommy）尋晚喺快活谷戥老友高興拉頭馬，都應該笑番吓喇啩。
張宇人尋晚現身馬場，佢老友記鄭強輝嘅愛駒「萬子千紅」喺第二場以兩倍半大熱跑出頭馬，贏得卅六萬幾元嘅馬主獎金。鄭強輝尋晚無到，Tommy代老友拉頭馬，不過問到有關自由黨嘅問題，包括佢同剛退黨嘅田北辰再見仲係咪朋友、信唔信田北辰同匯賢智庫立法會議員葉劉淑儀組黨等有關問題，佢都話唔想答，講明「今日唔講自由黨，淨係講馬」。不過問到佢關於馬嘅問題，亦都唔見得佢想講，因為佢叫大家去問練馬師。
早走投票撐黨友
Tommy為老友記拉頭馬，認真夠義氣。但尋晚佢喺馬場留到第五場就走咗，原來係趕返立法會投票。投乜票咁緊要？之唔係支持佢喺黨嘅兄弟、自由黨另一副主席方剛囉。方剛提出推動廢物循環再造產業嘅動議，當然要出席支持，惟有團結，個黨至可以撐落去嘛。