- on.cc 東方互動主頁
- 4月4日 (五)
做咗立法會議員兩年有多嘅民建聯陳克勤，早係有樓之人，最近仲升格為包租公。話說克勤仔本月頭提交嘅最新議員利益申報顯示，除咗馬鞍山嘅住宅外，最近添多咗一項以公司名義持有嘅物業。佢笑笑口同我哋講，前排女友同朋友睇中深水埗一個千五呎舖位，依家仲做緊食肆，有兩年合約在身。克勤仔諗清楚之後決定去馬，同朋友以公司揸舖，五五分帳唔使拗。
雖然克勤仔唔肯透露間舖買咗幾多錢，不過就話同銀行做咗七成按揭，佢同朋友每人每月夾兩千蚊就夠供樓。我哋上網搵過，類似舖位由五百幾萬至過千萬不等。做咗議員果然不同凡響，身價都唔同啲，每月薪津大大話話有十幾廿萬元，依家仲唔使向黨上繳添，唔怪得有閒錢買舖喇。
政府啱啱先出手打擊樓市炒風，商舖唔受影響，即係話，即使佢短炒，都無乜問題。不過克勤仔話，最有眼光嘅唔係睇中間舖，而係搵啱女友，事關今次同朋友夾份買舖，都係女友嘅主意。睇嚟佢都應該快啲同女友拉埋天窗，咪走寶喇！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
