政情：扮嘢文首玩機動遊戲

扮嘢文自爆咁大個人都從未玩過機動遊戲，今次為咗幫海洋公園宣傳，捱義氣獻出第一次。佢邀請我哋玩埋一份，但見到呢個機動遊戲不停咁fing，上到半空成個人倒轉，當堂心都離埋，唔敢同佢一齊玩。扮嘢文玩完落番地面之後，都話仲feel到個胃喺度不停咁fing。佢為海洋公園肯搏肯捱，認真係唔話得！

不過扮嘢文聖誕節就唔會留喺香港玩機動遊戲嘞。佢透露聖誕前會上成都，主持佢一手一腳「湊大」嘅成都蘭桂坊開幕儀式。成都蘭桂坊係扮嘢文近年精心傑作，整區面積達四十五萬平方呎，大過中環蘭桂坊十八倍，半空有個巨型玻璃天幕，串連區內十九幢建築物。成都蘭桂坊已陸續有香港食肆進駐，仲不時有戶外文化表演，酒吧餐廳晚晚爆棚，已成為成都至潮新蒲點，扮嘢文果然冇白費心機。