中環出更：陳淑玲鍾情Aquascutum中褸
長江製衣董事兼YGM行政總裁陳淑玲（Shirley），經營服裝品牌經驗豐富，依家公司旗下已經有好多不同風格嘅名牌。尋日卓妮見佢着咗件好搶眼嘅Aquascutum中褸，出席香港中小型企業商會主辦嘅「港品牌、拓內銷」研討會，唔使多講，佢一企出來已經係港商成功發展品牌嘅最佳典範。
Shirley七十年代讀完書返港後，陪住爸爸長江製衣創辦人陳瑞球一齊打天下，依家佢又係品牌發展局主席，難怪尋日現身說法分享發展品牌經驗，吸引台下一眾有心闖蕩商界嘅中小企洗耳恭聽。
160年歷史英國名牌
Shirley話畀卓妮聽，佢哋以前係Aquascutum嘅代理，知道呢個有一百六十幾年歷史嘅英國名牌深受中、港兩地以及東南亞消費者歡迎，所以去年索性提出收購。佢自己都好鍾意呢個英國牌子，尤其是品牌主打嘅風褸系列，方便出入唔同場合，話啱晒應酬多多嘅商界大忙人。