政情：校友園揭幕 沈祖堯變景點
中文大學為慶祝五十周年校慶，喺大學東門外設立「金禧校友園」，種咗五十一棵樹代表歷屆畢業生，尋日開幕吸引咗六、七十名校友出席。不過，估唔到最受校友歡迎嘅「景點」竟然係校長沈祖堯，校友們爭相要同佢合照，一度出現等影相嘅人龍，雖然影相影到流晒汗，但佢仍然面露微笑兼來者不拒。
沈校長好識搞氣氛，主持揭幕時高舉象徵灌溉嘅水杯呼叫「飲勝」，又打趣話校友園塊地雖然沙士時做過實驗室，「但塊地做過手腳，依家好安全」。為慶祝校慶，中大仲請到中國藝術研究院中國雕塑院院長吳為山為校友園設計一個由青銅及不銹鋼製成嘅蛋形雕塑，從唔同角度睇會見到青少年同老人嘅面孔，代表中大嘅傳承，但要到出年三月先從北京運到港。
此外，校園嘅百萬大道尋晚亦舉行「百萬零一夜」嘅五十周年匯演，除咗有特別燈光表演，大會更邀請全場過千出席者下載專用手機程式，用手機畫面光源照亮校園，場面壯觀。