政情：田二少訪西環惹揣測
港區人大尋日喺中聯辦開例會，最近成為政壇焦點嘅自由黨內訌風波主角田北辰都有出席，個會下午五點開始，但佢四點零十分就入咗中聯辦，足足提前五十分鐘。佢喺中聯辦做乜嘢？見咗邊個？可惜，例會後田二少坐中聯辦嘅車靜雞雞喺秘密通道離開，事後亦無回覆我哋嘅電話。
自由黨功能界別同直選路線之爭升級，迫使中常委田二少提出退黨，星期一傍晚，田二少、田大少田北俊、主席劉健儀（Miriam）同前副主席周梁淑怡去中聯辦密斟，會面翌日大家齊齊封口。事隔兩日，田二少喺人大例會前提早五十分鐘再踏入中聯辦，難免惹人遐想。
我哋諗住等佢開完會，當面向田二少問個究竟，點知佢「有入無出」，靜雞雞循秘道離開，避開傳媒，而同為港區人大嘅Miriam更加進出都用秘道，二人擺明封口。自由黨內訌不停，最頭痛嘅，相信係班一直幫佢哋箍煲嘅中聯辦官員！