政情：肥平返娘家Sell客家節
鄉議局及嘉應商會等團體聯合主辦嘅香港客家文化節下月初展開，重頭項目係下月四日喺大埔林村許願廣場舉行嘅客家炆豬肉大賽。擔任文化節籌委會主席嘅前民政事務局局長何志平，尋日就以中華文化學院主席身份返到灣仔修頓中心民政事務總署半個「娘家」，向十八區區議會正副主席推銷客家文化節。正所謂「唔怕貨比貨，最怕唔識貨」，唔知班主席有冇掛住肥平呢？
今次客家炆豬肉大賽共有七支隊伍參賽，包括忠誠盆菜、泰亨盆菜、彩福企業、客家概念廚房、福臨美食、稻香「客家好棧」等，而鄉議局主席劉皇發及副主席張學明等鄉紳合資嘅大日子酒家都有參賽，爭奪炆豬肉大王寶座。據講評判方面請到「和味蘇」蘇玉華、時裝設計師鄧達智、食家唯靈、深水埗容記小炒王大廚易偉容、蛇王芬代表吳翠寶等，陣容相當吸引。
肥平話，比賽當日會筵開嘅百幾圍席券已售罄爆滿，希望開多十幾圍，屆時就可能要坐逼啲嘞！不過，按照比賽章程，每間食肆負責嘅席數不能超過二十圍，即七支隊伍共負責一百四十圍；如果要再加多十幾圍，就可能要請其他食肆到會嘞！