政情：自由黨夾口形家醜冚到實

自由黨內訌風波震撼政壇，適逢尋日立法會開星期三大會，自由黨三位正、副主席喺立法會大樓內被迫困獸鬥，對住傳媒避無可避，焗住回應。至於佢哋嘅答案，就信不信由你嘞！

張宇人「讚」田二少斯文

好似問到田北辰退黨傳聞，主席劉健儀（Miriam）話：「無嘢發生過。」仲叫記者自己問田二少添，跟住就封口唔答。唉，如果田二少肯覆機，記者就唔使打擾Miriam啦，又如果真係無嘢發生過，點解田二少突然隱形？

兩位副主席方剛同張宇人（Tommy）亦全面否認內訌。過往就最低工資同大家樂扣飯鐘錢風波同田二少頂到行嘅Tommy，話同田二少相識四十年，從未嗌過交，又讚二少「份人好斯文」。問佢黨內係咪好多人不滿田二少，Tommy無落井下石，只係話：「我唔清楚喎。」Tommy忽然對田二少咁客氣，喺呢場內訌風波中邊個佔上風，不言而喻。

方剛就話，自由黨無炒大鑊，田二少同Tommy只係理念有少少唔同。問到田二少喺黨內係咪好霸道，佢無承認，又唔否認，只支吾以對：「唔……佢（田二少）比較有理念……」對外間盛傳事件驚動中聯辦調停，方剛答得仲妙：「係咩？我無入中聯辦。」呢句最真，我哋收到嘅消息，都係話前日傍晚田北俊、田北辰、Miriam同前副主席周梁淑怡現身中聯辦，方剛嘅答案更加證明消息可靠，絕非靠估。

自由黨因開拓直選，觸發一場路線之爭嘅大內訌，一眾高層竭力掩飾，戲軌點行，由自己決定。不過，政治對手把口，就唔到佢哋控制，Miriam尋日提動議辯論，狠批社福安全網千瘡百孔，民主派趁機冷嘲熱諷一番。民主黨黃成智、民協馮檢基、街工梁耀忠同社民連陳偉業發言時，都好似夾定咁一齊寸自由黨，話直選威力真大，自由黨都要做到民心我心，提民生動議。睇嚟內訌對自由黨真係弊大於利！