政情：劉健儀出戰新界東
自由黨備戰二○一二年立法會選舉大變陣，主席劉健儀（Miriam）正積極部署轉戰直選新界東！據悉，其已雄踞十五年的功能界別航運交通界議席，亦已搵到接班人選，係一名入黨得幾個月嘅業界人士，即係話，Miriam兩年後同「候任」副主席田北辰雙雙出戰新界東同新界西，已係箭在弦上，勢在必行。近年備受黨內高層力捧、喺新東磨劍多年嘅自由黨區議員方國珊，邁向排頭位出戰之路，或要行多四年到二○一六年嘞。
Miriam九五年起一直循航運交通界進身立法會，但自由黨近年矢志開拓直選版圖，身為主席嘅Miriam也難避直選烽火。消息指，一二年勢將議席加碼嘅新界東、西，成為自由黨直選戰場唯一有把握之仗，現時中常委田北辰已鐵定戰新西，而Miriam係黨主席，直選勝敗意義重大，「唔通落港島、九龍東、西，或者選超級區議會博一鋪咩，輸咗點算呀？」所以，Miriam已選定落戶安全系數最高嘅新界東，現時唯一變數，係接班人有冇能力保住航運交通界呢個堡壘。
方國珊讓路再度抬轎
據悉，Miriam近月已靜雞雞物色到一位接班人選，由於仲要觀察，所以一直未向外界披露。不過，Miriam收徒為轉戰直選鋪路嘅消息，近日已喺黨內傳開，呢位Miriam新愛徒相信係從外面延攬入黨，依家每個星期一參與田二少領軍嘅「一般事務關注組」會議，熟習自由黨政策立場同文化，互相適應，如果最終一拍即合，航運界將現新面孔甚至挑戰者，淡靜十五年嘅選情勢將再起風雲。
Miriam若轉戰新東，首當其衝嘅係自由黨西貢委任區議員方國珊，事關田少引退後，方一直被視為最有力代自由黨收復失地嘅人選，豈料現時橫生枝節，打亂部署。消息指，方的優勢是年輕，如能先後為兩任主席抬轎，一六年出戰在黨內更具威望咁話。
我哋向Miriam求證轉戰新東之說，佢話，自由黨○八年一併輸掉新界東、西，下屆一定派人參選，而佢亦有意直選，但強調布陣人選要經內部再協調，至於港島、九龍東同九龍西，出戰機會就唔大嘞，Miriam又證實已物色到代佢參選航運交通界嘅適合人選。
方國珊則指，一二年選舉現時言之尚早，一切視乎佢明年直選區議會戰績同當時區民支持度而定。