政情：經濟動力晒冷搵名導撐場
經濟動力尋日主辦「2010同心結力抗毒大行動」啟動禮，除咗請嚟政商界撐場，最巴閉嘅係一次過請到四位著名大導演出席，佢哋包括《無間道》導演劉偉強、《金雞》導演趙良駿、新進導演黃修平同埋張同祖。其實都係反映電影界向學生宣揚反吸毒不遺餘力啫。
擔任短片創作評判
抗毒大行動今年已經係第二屆，有幾百間中小學響應。啟動禮上四位名導演上台同一班中學生分享拍戲心得，不少學生都舉手發問，想了解導演嘅過人之處。為咗令學生了解毒品禍害，抗毒大行動今年仲搞咗個短片創作比賽，評判當然就係呢四位名導演啦！經濟動力仲打盡「人情牌」，請到商界好友贊助iPad作為冠軍獎品，搞到學生反應勁踴躍。
經濟動力立法會議員林健鋒話，佢哋搞呢個活動足足忙咗個幾月，好彩幾位名導演同高官無「托手㬹」，好爽快應承出席活動，就算係星期日放假日子都無所謂，認真畀面！