政情：林D9中一矮細冇自信
做官最重要有咩特質？好可能就係自信心，到時就可以將攣都講番直。有「人肉錄音機」之稱嘅政制及內地事務局局長林瑞麟（林D9）就係當中表表者。不過林D9尋日同華仁一班師弟分享運動心得時，就自爆自己中一時太矮，搞到個人冇乜自信，最後努力練波兼增高，信心至返晒嚟。
林D9尋日話，自己中一嘅時候好細粒，入學時得四呎六吋半，唔夠高入羽毛球校隊，搞到有啲唔開心，但最後廢寢忘餐狂練波後，中二增高到四呎九吋半，第一次入校隊就攞到獎牌，自此信心大爭，之後仲跑埋千五米奪冠，十足十運動健將。
不過畢業後走入官場熱廚房三十幾年，林D9話做運動嘅時間驟減，依家可以keep到每晚同太太帶埋隻愛犬拉布拉多由舂坎角屋企行落赤柱，再返屋企做sit up；又或者周末跑吓山、約大學同學打羽毛球，只係腰圍依然由最fit嘅廿八吋增加到依家嘅卅七吋。林D9話，唔介意身形，最緊要健康喎，好阿Q！