政情：楊孫西拉頭馬請食蟹
福建幫頭領、全國政協常委楊孫西同愛兒楊華勇最近馬運亨通，佢哋聯名擁有嘅愛駒「財富之星」繼上月中爆冷奪冠後，上周三快活谷夜賽又爆冷奪冠，贏得卅六萬元馬主獎金，但當晚華勇離境公幹，楊孫西就由打氣到拉頭馬一手包辦。一連兩月贏頭馬，楊氏父子異口同聲話要請好友食大閘蟹慶祝吓！
愛駒勝出，華勇好雀躍。佢話愛駒喺短短兩個月內連贏兩次頭馬，算係意外收穫，仲話匹馬hea咗咁耐，養精蓄銳，都係時候發力。講起食大閘蟹慶祝，華勇話佢屋企每年都搞一、兩次大閘蟹聚會，講嘅係佢清水灣「白宮」，皆因佢同爸爸都好鍾意食，但膽固醇高唔敢食咁多，好似早前喺老正興買咗批大閘蟹宴客，佢都係食兩隻咁多，點到即止。
楊孫西呢兩日去咗廣州睇亞運，華勇話要等爸爸返港後才能定出大閘蟹宴日期。依家已係十一月中，睇怕佢哋要快啲安排至得，事關食大閘蟹差唔多係水尾架喇。