政情：民記戰立會評分薦人選
立法會直選議席僧多粥少，每次選舉政黨內部都爭崩頭，民主黨早有一套內部甄選機制，而建制派直選大戶民建聯則一直以政治協商解決。不過，隨着第二梯隊競逐出選權嘅競爭愈嚟愈激烈，民記亦要求變，高層正研究為二○一二年立法會選舉設立甄選制度，以地區工作、知名度同議政能力等一系列評分，決定出戰人選。甄選機制看似較公道，但民記有第二梯隊質疑，考核制度對新人未必公平。
據了解，民記內部已成立由副主席溫嘉旋率領嘅工作小組，專責研究立法會直選出戰權甄選機制，敲定方案後交由民記主席譚耀宗揸旗嘅選舉委員會定案，再經中委會拍板確立，預料最快喺一二年立法會選舉中首度登場，屆時民記內有志直選之士未同其他政黨廝殺，內部已先展開一場大火併。
劃時代之舉 圖解黨內紛爭
民記一向走權威管治，每次立法會直選嘅出戰機會誰屬嘅決定權，長官意志佔好大比重，設立甄選考核機制，可謂劃時代之舉。消息透露，甄選機制涵蓋五區直選同功能界別區議會超級議席，選拔嘅具體細則未定，估計會按選拔政策副發言人制度為樣本，邊位黨員想參選，都可以報名，然後進行面試遴選，按報名者嘅地區政績、知名度同綜合議政能力各自評分，最高分者就可以攞到出戰立法會嘅入場券，聽落相當刺激，娛樂性高過港姐選美。
甄選機制可以減低人治色彩，對政黨邁向成熟有正面作用，尤其萬人黨民記近年大量吸納新血，依家有唔少第二梯隊磨拳擦掌等待機會上位，就算直選議席一二年新增五席，仍然僧多粥少，民記內部爭奪出戰權，以及爭拗邊個排參選名單首位，肯定好激烈，搞個甄選機制出嚟，就可有助化解黨內紛爭，一舉兩得。至於可唔可以擺平各方面爭拗，就有待觀察。
有民記第二梯隊指，民記內有實力跑直選嘅人多，但直選參選位置始終有限，設立甄選機制可能公平啲，但擔心用意雖好，運作起上嚟會有走樣情況，舉例講，以知名度評分，新人就肯定唔及現任議員啦，變相對第二梯隊唔公平；當有兩個競逐者評分相若，好大可能會由中委會投票定奪，如此一來，又返到舊難題，就係由人嚟決定誰人參選，最終難以擺脫「內定」疑雲，分分鐘引起更多黨內爭拗。