中環出更：老婆扮性感女僕 王桂壎詐型
咪睇律師呢個行業平時嚴肅拘謹，當佢哋玩起上嚟其實一啲都唔輸蝕。律師會體育及康樂活動委員會早前喺香港足球會搞咗個叫做「全城律師哈佬WIN」嘅萬聖節party，當晚嘩鬼出籠，群妖亂舞，除咗可以即場買衫扮鬼扮馬之外，更加有專人為參加者化裝，真係既貼心又細心。
律師會會長王桂壎當晚一身歐洲皇帝裝扮，其他賓客見到都紛紛上前讚佢有型，至於佢太太Angela就更加艷光四射，身穿一套性感女僕裝，捧住啲飲品扮侍應，王桂壎見到都忍唔住講：「老婆，乜你着成咁呀？快啲搵件衫遮住啦！」
律師會搞「哈佬WIN」派對
除咗王會長之外，本身係馬會大董嘅律師會前會長周永健都有畀面出席。周律師話，自己平時好悶好嚴肅，以前喺外國讀書都唔會趁萬聖節出去玩，不過今次都破例戴上面具搞氣氛，佢仲透露，原來體育及康樂活動委員會嘅歌係由佢創作，所以到依家仲記得點唱㗎。
除咗兩位星級嘉賓外，其他律師會理事一樣盛裝出席，好似彭韻僖、黎雅明同林新強幾位律師咁，大家嘅嘩鬼造型維妙維肖。而派對搞手簡家驄律師就話，今次係首次以萬聖節做主題，希望可以聯繫更多年輕會員，同埋畀機會會員輕鬆一下，佢喺派對開始前特登請立法會法律顧問馬耀添上台介紹畀大家識，原來立法會依家請緊助理法律顧問，律師會活動咁好機會，梗係要推介一下啦。
講番個派對，除咗一眾名人外，唔少女會員都打扮到鬼火咁靚，其中一位叫Verona嘅靚女除咗身穿紅色旗袍扮女鬼，仲特登去深水埗買咗個假BB公仔，再加埋把油紙遮，見到佢都幾令人心寒，絕對係誠意之作，好多賓客仲特登埋去同佢影相添！
卓妮