政情：阿寶邊讀書邊練車

其實早喺今年一月，阿寶已獲得教院頒發榮譽院士學位，表揚呢位亞洲車神對運動及社會所作出嘅貢獻。諗唔到現在阿寶與教院又「結緣」，成功申請入讀該校嘅健康教育榮譽學士課程，進一步upgrade自己，呢份永遠追求進步嘅精神，真係好值得年輕人學習。

與阿寶一齊進修嘅，仲有另一位香港單車代表郭灝霆，佢哋兩個明日將出席開學禮，與傳媒會面，分享心情。同日教院校長張炳良亦會聯同教職員一齊出席開學禮，介紹今年獲政府資助開辦嘅教育相關本科、哲學碩士及哲學博士課程。

教院校園位於大埔郊外，自成一國，而湊巧阿寶又經常與香港隊「踩」入大埔大美督、新娘潭一帶訓練，睇嚟佢日後大可以「寓返學於練車」了！