政情：莎姐重操黨務平衡勢力

自由黨○八年立法會選舉受挫，觸發兩位靈魂人物田少同莎姐辭去正、副主席職務，雙雙退出自由黨權力核心，黨務大權交棒三位正、副主席劉健儀、張宇人同方剛，以及中常委田二少。莎姐對政壇一啲都冇戀棧，有時間就同老公遊埠，不知幾優游。直到今年三月，副主席張宇人一句「最低工資最啱定喺二十蚊水平」，令自由黨捲入政治漩渦，據悉，當時劉健儀四人馬上搵來田少同莎姐商議對策，開過多次會議，一步步走出低谷，而變相掌握黨內一切重大決策大權嘅G6，亦由此成形。

直選功能界別三對三

G6至今已演變成恒常機制，六人定期碰頭，商議黨大方向及為重大政策定位。莎姐由上周起列席逢星期一由田北辰與地區骨幹進行「腦震盪」嘅一般事務關注組會議，就係佢再涉黨務嘅具體行動。田少同莎姐積極參與釐定黨嘅方向，原來仲起着平衡黨內嘅直選與功能界別兩派勢力嘅微妙作用添。

點解咁講？心水清嘅人都知道，自由黨喺立法會裏面嘅三人，都來自功能界別，對黨嘅定向難免偏向功能界別，不過直選至係政黨嘅長遠目標，而田二少嘅立場都傾向於直選，田少同莎姐都經過直選洗禮，田少同莎姐介入咗之後，G6就成為三票直選對三票功能界別，黨嘅立場就唔使偏埋一邊。

講番一般事務關注組，係田二少瞓身睇自由黨黨務嘅重要新猷，每逢星期一，由佢同四個地區支部嘅年輕骨幹討論時政，一嚟培育新人，二嚟度橋省招牌，據聞，自由黨批評被施政報告「置安心」抄橋嘅「租積金」房屋政策建議，就係關注組腦震盪「震」出嚟。關注組有莎姐做補習老師，度出嚟嘅橋，就會更加成熟啱用嘞。