中環出更：蔡關穎琴李垂誼音樂結緣
中華總商會會長蔡冠深全家都係音樂發燒友，佢多次喺山頂大屋舉行音樂會，邀請過百名賓客欣賞鋼琴家郎朗、世界著名大提琴家李垂誼（Trey）等名家嘅演奏。蔡太蔡關穎琴（Janice）最近更加喺老公支持下，成立咗垂誼樂社並親任主席，Trey出任藝術總監，兩夫婦愛才之情唔使多講。
尋日Janice現身推介樂社嘅頭炮音樂會，下周二Trey將與慕尼黑室樂團合作演出，並為香港演藝學院籌款。卓妮問Janice點解對音樂咁癡迷，先知佢哋全家人都唔簡單。Janice六歲開始學鋼琴，後來學埋唱歌，鋼琴同埋聲樂都考到八級資格。
Janice話，佢結婚前掹咗蔡冠深學唱歌，雖然老公事業繁忙未能持之以恒，但畀老師啟蒙咗佢唱高音嘅天分。蔡太笑稱：「佢唱到嘅高音仲高過我！」老公有時喺屋企食完晚飯後，會一時興起引吭高歌，蔡太就彈琴助興，場面不知幾溫馨。
蔡家五個子女喺父母影響下，音樂造詣都唔錯。例如今年十五歲嘅囝囝已經考到鋼琴八級，今年將報考演奏級。
早前卓妮講過，蔡生早幾年為咗招待郎朗到屋企演奏，租咗部名貴史丹威三角鋼琴，後來索性買咗部擺喺屋企，依家部鋼琴變咗鼓勵子女嘅工具。Janice話，惟有考到八級資格者，喺表演或考試前夕至可以掂部名琴㗎！
幫大提琴買機票
尋日Trey攜帶Pressenda大提琴出席，把琴係從台灣奇美博物館借出，為期一年。Trey話，奇美嘅收藏全球知名，又不吝於免費借出，佢次次搭飛機都要幫個琴買多張窗口位機票，仲要全程攬實添！
卓妮