中環出更：郭永亮睇好男士護膚市場

當日下起微雨，西裝骨骨嘅Andy冒雨巡舖，佢睇嚟好親民，喺舖頭內同店員有講有笑，更不時走出舖頭外，抬頭望吓新設計嘅廣告招牌夠唔夠吸引。

卓妮上前拍佢膊頭，Andy顯得愕然，隨即請卓妮入舖頭參觀吓，順便分享創業心得。

Andy冒雨到銅鑼灣巡舖，對店內擺設睇得好仔細。

與員工交流營銷心得，Andy全無老闆架子。

Andy介紹自己，原來佢係執業會計師，因為貪靚，四年前起投身化妝品行業，設廠為唔少護膚品牌生產化妝品。直至兩年多前遊瑞士滑雪，遇上醫學護膚品牌Dermagram，腦海頓時「叮」一聲靈感湧現。

Andy憶述兩年多前去瑞士滑雪，令佢與Dermagram結緣。 （溫國佳攝）

郭太（左）將護膚品轉晒做Dermagram，以行動撐老公。 （資料圖片）

引入醫學品牌 打響名堂

話說Andy嗰次與當時仍為女友嘅太太滑雪，被風雪吹到面珠爆拆，刺痛難當，即使搽了女友帶來嘅護膚霜仍然無效，急急走去當地大藥房搵「解藥」，買來一瓶Dermagram紓敏日霜，紅腫果然消退。咁正，當然要引入香港喇！去年底，Andy成功將品牌引入香港，開設四間專門店及三間美容中心，更磨拳擦掌進軍內地市場。

卓妮好奇問佢，貪靚嘅舅母李嘉欣係咪佢客仔？Andy賣關子話:「唔知呢，或者佢自己買啩！」不過郭媽媽同太太就非常支持，即時將化妝枱上嘅護膚品，換晒做Dermagram。Andy話，客源要不斷擴大，男士都係佢目標，事關男人護膚已成大趨勢，愈來愈多男士敲門話要做Facial喎。