政情：金勞詹「聲大」地勤投訴
立法會議員詹培忠早排喺拉斯維加斯參加百家樂大賽，之後經溫哥華返香港，點知遇到小插曲，最終仲驚動埋航空公司高層添。我哋早排收到個電郵，報料人聲稱目擊詹Sir喺溫哥華機場用好冇禮貌嘅態度鬧啲國泰航空嘅地勤，最終仲搞到要報警先至收到科。
我哋尋日打畀詹Sir求證，佢對呢件事唔肯多講，叫我哋直接打畀「偉茵」問喎，究竟邊個係「偉茵」呀？原來係國泰航空企業事務董事莊偉茵。
莊偉茵同我哋講，原來詹Sir當日想提早離開溫哥華，不過由於機位真係滿晒，地勤職員被迫拒絕。詹Sir真係唔係幾開心，最終都要喺原定時間先可以返香港。莊偉茵承認，詹Sir事後的確打過電話畀佢，佢亦好努力咁同詹Sir解釋，件事最終都解決咗。佢話：「詹生係我哋馬可孛羅會嘅尊貴會員，我同詹生都好好朋友，解釋後都冇事。詹生講嘢係大聲啲，平時開心同唔開心都會大聲㗎啦。」由高層親自出面擺平，詹Sir條氣當然順番晒啦，至於佢當日對前線職員嘅態度係點，呢個真係當事人先知喇。