政情：被人擺上枱 仍放假攤抖
施政報告劣評如潮，煲呔曾四圍解畫，尋日上英文電台，被問到扶貧招數「關愛基金」搵政務司司長（ＣＳ）唐英年做主席，有為唐唐日後競逐特首造勢之嫌，佢即時反駁講法荒謬，話主席人選要有誠信、有聲譽同可獲各界認同，政務司司長係最佳人選，點知鬼拍後尾枕，佢將Chief Secretary（ＣＳ）講為Chief Executive（特首），唔知係咪佢潛意識認定唐唐想爭特首寶座。煲呔曾發覺自己噏錯嘢，急急糾正，但已覆水難收，味十足。
「關愛基金」表面睇係濟世紓困，但若效果不彰，隨時成千夫所指，煲呔曾叫唐唐做基金主席，到底係益佢定跣佢，有待時日考證。不過唐唐至今嘅表現，用番佢嘅名言嚟形容就最貼切，就係：「條條fing！」
施政報告星期三發表以嚟，相關政策局局長好似走馬燈咁輪流開記者會或上電台為政策推銷同解畫，好似發展局局長林鄭月娥講規管「發水樓」、勞工及福利局局長張建宗講交通津貼、運輸及房屋局局長鄭汝樺講「置安心」房策，連教育局局長孫明揚都出嚟講吓國民教育，但作為「關愛基金」揸旗人嘅唐唐就連影都無，無開記者會，無上電視推銷，連簡報會都無，「關愛基金」喺唐唐心中變咗「關人基金」，好似完全唔關佢事一樣。
點解唐唐唔開記者會呢？尋日嘅憲報畀咗答案大家。原來唐唐由尋日（十五日）起休假至十九日，期間其ＣＳ職務由政制及內地事務局局長林瑞麟署理。日求夜望能早日獲關愛基金澆灑甘露嘅貧苦基層，睇到呢則刊憲消息後，唔知有乜感想？
揼低成籮問題唔理
自「關愛基金」計劃公布後，城中巨富已紛紛表態願意捐出數以億元計善款，但基金到底點樣運作、有乜扶貧項目同人事架構等等，一切懸而未解，唐唐竟然揼低一大堆問題唔理，走去休假攤抖，只係尋日喺報章撰文，簡單解釋基金六點運作原則，好似盡量減少行政費用、精簡審批、基金投資回報將作撥款主要來源等等，又話當務之急係加緊籌組基金委員會。其實，關愛基金要有效幫窮人，當務之急係唐唐戒掉「條條fing」嘅心態就真！