中環出更：龔仁心開P賀酒店開幕
華懋集團日前爆冷投得九龍塘義德道地王後，身為集團執行董事及管治委員會主席龔仁心都表現得好風騷，尋日同太太劉元春、妹妹龔中心及因心、華懋高層等一齊出席集團旗下港島南區南灣海景酒店（L'hotel Island South）開幕禮，由傍晚六時開幕禮玩到晚上九時慶祝派對，表現得情緒高漲，仲落舞池與衣着性感嘅女郎跳舞，成為全場焦點。
活化南區工廈而成
南灣海景酒店係港島南區及黃竹坑首個活化工廠大廈重新建成嘅酒店，主打年輕時尚路線。尋日開幕禮同慶祝派對有超過四百位名人出席，唔少係政商界名人，好似金至尊集團主席黃英豪、行政會議成員梁智鴻太太、自由黨周梁淑怡、「鐘錶大王」孫秉樞、理大校長唐偉章、太子珠寶主席鄧鉅明及執董朱繼陶、青年事務委員會主席陳振彬、林健康夫婦等。
龔仁心難得現身，好多記者追問佢對賣地、樓市走勢及規管「發水樓」嘅意見，但亦有人問佢會否支持施政報告提出嘅關愛基金。龔仁心只係話：「華懋都有慈善基金，都會計劃做啲嘢嘅，可惜有官司在身，基金唔用得住，所以唔係自己想點做就點做！」咁會唔會捐錢畀關愛基金呢？佢就反問：「係咪一定要捐畀關愛基金呢？我哋都唔知，華懋慈善基金有監管人，不過無問題啦，遲啲做之嘛！」
至於華懋集團主席龔如心遺產官司案有乜新進展，龔仁心只拋出一個「等」字。佢話大家都知道明年一月十日再開庭，一切要等到時才有分曉喎！龔仁心仲預告，南灣海景酒店開幕後，集團明年喺觀塘及尖沙咀廣東道都有新酒店開幕，旗下酒店數目將增至五間，總之滿腹大計喺喇！
卓妮