政情：吳秋北鋪路進身立會
工聯會近年逐漸向政黨化發展，該會最近初步敲訂立會選舉嘅布局，並打算提名理事長吳秋北做勞顧會委員，呢個安排，顯示吳秋北極大機會喺嚟緊嘅二○一二年選舉進身立法會，呢個布局亦正係政圈早前風傳工聯會會搵新秀盤據勞工界議席，老將就打直選嘅策略。
年前先以新鮮人面孔當選理事長嘅吳秋北，係工聯會力捧嘅對象，今次火速成為勞顧會提名委員，更顯示佢篤定會行工聯會領導層進身立法會之路，即係先做工會要職，然後喺勞顧會吸收經驗，之後代表工聯會入議會，現任會長鄭耀棠當年進身立法會前，就係咁樣行，之後又有前任理事長、現任工聯會立法會議員黃國健等。
工聯會議員嘅最大政綱就係勞工事務，喺勞顧會浸過，可以培養佢哋對勞工政策同勞資高層協商嘅經驗。不過，吳秋北今次做勞顧會據講係揠苗助長嘅結果，因為原本代表工聯會嘅勞顧會成員崔世昌唔願進身立法會，所以搵咗按計劃應該遲啲先接棒嘅吳秋北頂上。