政情：吳秋北鋪路進身立會

年前先以新鮮人面孔當選理事長嘅吳秋北，係工聯會力捧嘅對象，今次火速成為勞顧會提名委員，更顯示佢篤定會行工聯會領導層進身立法會之路，即係先做工會要職，然後喺勞顧會吸收經驗，之後代表工聯會入議會，現任會長鄭耀棠當年進身立法會前，就係咁樣行，之後又有前任理事長、現任工聯會立法會議員黃國健等。

工聯會議員嘅最大政綱就係勞工事務，喺勞顧會浸過，可以培養佢哋對勞工政策同勞資高層協商嘅經驗。不過，吳秋北今次做勞顧會據講係揠苗助長嘅結果，因為原本代表工聯會嘅勞顧會成員崔世昌唔願進身立法會，所以搵咗按計劃應該遲啲先接棒嘅吳秋北頂上。