政情：克勤仔驗身虛驚一場
脂肪肝呢個隱藏都市病有機會演化成肝硬化甚至肝癌，但民建聯早前做嘅調查，就發現好多港人都對呢個病認知不足。不過負責調查嘅陳克勤尋日竟然喺記者會上「倒米」，直言自己冇為自己嘅肝做檢查，但就自爆年紀輕輕就膽固醇超標，更發生咗一幕心律不正驚魂。
克勤仔尋日話，自己都算後生，所以只係每年做一個簡單嘅身體檢查、隔年先做一次詳細嘅。佢話幾年前驗身時，發現膽固醇輕微超標咗百分之零點二，更話佢心律不正。克勤仔睇完報告後忐忑不安，營住自己個心跳得好快。為咗釋疑，佢決定做一次詳細檢查，後來發現只係虛驚一場，醫生話之所以搞出個咁嚇人嘅結果，可能係因為佢上次做檢查時，咁啱畀樓下車輛嘅噪音嚇親咋喎。
克勤仔又直言好鍾意食魷魚、豬潤腸粉等膽固醇極高嘅食物，知道自己年紀輕輕就「爆標」，惟有忍口，改食清淡嘅麥皮做早餐，配合埋定期運動，依家佢嘅膽固醇已經回落番去正常嘅level嘞！