民政處官僚拒發通行證
兩個通訊地址惹麻煩！西貢原居民劉先生居於北潭涌多年，每年均有向西貢民政處申請「關閘車輛通行證」。不過，劉因早前在市區置業，更改通訊地址後即被拒發通行證，「北潭涌嗰個信箱係公眾信箱，我將供車會嘅地址改做市區都係想安全啲，佢哋咁就話我唔係住喺嗰度。」
經本報轉介，當局要求劉先生須由村長簽名核實村民身份，才獲發通行證。西貢民政事務處發言人回應稱，凡遞交足夠文件申請人均可獲發通行證，即使擁有多於一個通訊地址，一般不會影響申請。
立法會民政事務委員會王國興批評民政事務處做事官僚，未有與民為便，「個原居民一直都有申請，又唔係咩新申請，冇必要留難佢。」王促當局處事以服務市民為宗旨，勿為市民製造不必要麻煩。