政情：棠哥收厚禮怕違規
人稱「新界王」嘅行會成員劉皇發漏報買樓利益，風波至今未平，令政界中人談利益申報色變。不過，如果好似身兼行會成員嘅工聯會會長鄭耀棠咁小心謹慎，即使伙記疏忽大意，都唔使驚會鬧出漏報風波嘞。
棠哥尋日公布工聯會一年一度嘅深港金融業高爾夫球邀請賽具體安排，會後大家問佢點防止大頭蝦漏報失誤，佢話自己名下物業少，一個鐘頭寫完份行會申報表，不過，曾有一名已卸任嘅「商人局長」對佢呻過，話名下物業同公司太多，每次要搞足一個星期至列齊張清單，仲辛苦過搞自己盤生意，所以佢好諒解發叔喎。
棠哥話，雖然自己身外物唔多，但對申報仍小心翼翼，好似今年初佢出席活動後收到一份金光閃閃嘅紀念品，心情唔係興奮，而係心驚，驚價值可能超過行會申報冊上列明凡超過二千元就要申報嘅規定，於是返到屋企都打番電話畀主辦單位，問清楚鍍金定真金，搞清楚價值唔過二千蚊，先至安心收下。