抖咗兩個月暑，立法會將喺下星期三隨住新一份施政報告揭盅而正式復會。所謂「執輸行頭慘過敗家」，年年未復會前各議員已爭相提出議案辯論，希望搶飲頭啖湯，今年亦唔例外。
今年樓市狂飆，社會各界都抱怨上唔到樓，要求港府復建居屋嘅遊行示威更係年中無休，預計房屋政策點都會係今年施政報告嘅重點。
點知翻查議員提出議案嘅名單，白鴿黨李永達、富貴黨主席劉健儀同專業會議梁美芬等人打算提出嘅議案，十居其九竟然全部一窩蜂同房屋政策有關，似乎唔多信港府可以喺施政報告度解決呢個燙手山芋，未復會就先剃港府眼眉喎。究竟邊位議員可以成功提出議案，咁就要等遲啲抽籤定奪喇。
另外，街工梁耀忠就成為今年嘅「幸運兒」，可以喺施政報告之後嘅第一個立法會會議上討論佢年年必提嘅殘疾人士交通需要議案；早前因為跟八達通事件而上位嘅工聯會王國興，都成功「中獎」，可以喺復會後即刻跟進佢最關注嘅個人私隱保障議題。