政情：KK北海道豪擦和食
工聯會立法會議員黃國健（KK）上月喺釣魚島事件未升溫前，同太太、囝囝一家三口去咗北海道度假，KK話當地雖然風景優美，而且有美饌佳餚，但因為天氣唔係想像中嘅清涼，所以有啲失望。KK話，北海道今年日間竟然去到三十一度，連導遊都話天氣反常，東京就更加去到三十七度添。
雖然天氣一般，但當地食物真係值得一讚。KK話，北海道最出名就係海鮮同和牛，雖然呢兩樣嘢都價值不菲，但一場去到都不惜大破慳囊；以和牛為例，一盒八安士就要成千蚊港幣，好在食少少就已經覺得膩，所以唔會多食。海鮮方面，KK一家今次試咗新鮮雪場蟹，呢種蟹鮮味無比，但價錢同樣唔平，一隻一點三公斤嘅就要成千蚊港紙。
KK去北海道都不時浸溫泉，至於出名嘅花海就因為時間唔啱所以欣賞唔到。KK話，不過有機會再去的話一定要趁冬天去，因為希望欣賞當地名聞遐邇嘅雪景喎。