政情：金勞詹正名立會賭神

金勞詹憑「心清、數熟、贏谷、輸縮、夠毒、知足」十二字心法，大半生縱橫各地賭城，喺賭枱上贏錢無數，彪炳戰績近年經常曝光，精湛賭技漸為人認同，好似○八至○九年間，喺澳門賭場狂贏兩億元；去年十．一假期亦喺拉斯維加斯進帳逾千萬元。不過，金勞詹錢雖贏得多，但喺具代表性嘅賭枱賽事中勝出卻係人生第一次，立法會「賭神」稱號終於得到正名。

最後一局 反敗為勝

面對澳門同新加坡大興賭業，美國拉斯維加斯兩間賭場美高梅同永利近年銳意催谷百家樂大賽，成為各地好此道者嘅較技主戰場，金勞詹奪魁嘅大賽，就係前者所舉辦。對數字有天賦強勁記憶力嘅金勞詹，一向偏好有數得計嘅百家樂，賭城傳嚟嘅消息話，金勞詹贏得驚險，大賽分初賽、複賽、準決賽同決賽，金勞詹係賭城貴賓，由複賽落場，準決賽突圍，一直手風唔錯，直到決賽尾段，金勞詹手上嘅籌碼一直排第三位，為七十二萬美金，較排第一、二位嘅對手分別少兩萬同四萬美金，一路咬得好緊，戰情緊湊。

到最後一鋪，兩位對手買莊，金勞詹買閒，即自己操牌，由自己決定命運。派出嘅第一隻牌，金勞詹攞五點，莊家六點，以百家樂貼近九點為最大嘅原則，金勞詹第二隻只有攞二、三、四點先至贏，一點打和，其他求其九隻跌落佢度都會輸，即係論或然率，金勞詹輸咗七成半。金勞詹行運一條龍，最後攞到隻「二仔」，反敗為勝，勇奪冠軍，成為第一個喺拉斯維加斯百家樂正規賽事中名入三甲嘅香港人，變相為港爭光。

金勞詹一九七七年踏足拉斯維加斯呢個五光十色嘅沙漠綠洲後，三十年嚟年年都去一、兩次玩兩手，近年曾貪得意參加過兩次同類型百家樂賽事，都空手而回，今次總算揚威賭城。

我哋打電話畀仍然身在賭城嘅金勞詹，佢話唔想鼓吹賭博，指賭枱之上離不開運氣，但做人都係腳踏實地好；如果一定要賭，亦請量力而為，唔好影響工作同家庭咁話。咁又係，唔係人人都係金勞詹，佢嘅彪炳戰績係經過長期「練習」而修成正果，大人同小朋友都切勿模仿。