政情：阿忠大舊廿年冇偈傾
唔講唔知，原來同屬泛民主派嘅街工立法會議員梁耀忠同社民連立法會議員陳偉業，喺十九年前嘅全港首次立法會地區直選結怨，至今就算碰面都唔打招呼。呢個埋藏咗近廿年嘅秘密，隨着阿忠嘅新書《我固執而持久地過這種生活》而曝光。
阿忠早前花咗兩年時間寫書，講述佢由中學畢業、英國留學、踏上社運之路以至再成為立法會議員嘅人生點滴。書中最爆嘅秘辛，莫過於佢同大舊嘅一段恩怨。
事件發生於一九九一年，當時民主派喺葵青區好有勢力，李永達、大舊同阿忠都有意循新界南選區參選，當年行雙議席雙票制，三人協商一人自願退出。後來喺新界南民主派區議員聯席會議上投票，李永達同資淺嘅阿忠勝出，大舊極度憤怒，拍枱離場。
誰料到咗報名一刻，李永達公開表態拍大舊參選，阿忠惟有自己報名參選。書中形容，開票時兩人鬥得難分難解，大舊最終以約四千票之差險勝。自此一役，兩人就形同陌路。