政情：陳健波馬場得意釣場失意

雖然波哥馬場得意，但尋日就海上失意。波哥尋日邀請傳媒朋友遊船河相聚，陳太好有心，特登煲咗一大罉西洋菜豬骨粥畀大家喺船上享用。波哥上船後就安排議員辦事處職員、助理及記者進行釣魚比賽，最後大家共釣咗十幾條魚，唯獨波哥食白果，可能佢忙於招呼大家分咗心都未定。

立法會議員每年都會誕生大懶蟲，波哥一早就為自己埋單計數。佢喺○九至一○年度參與嘅委員會共有廿二個，其中十八個會達到百分百出席率，全年總共有三百三十二次會議，佢出席咗三百二十八次，只係有四次缺席，所以佢相信自己有機會問鼎最勤力議員冠軍寶座喎！