政情：余漢坤做好女婿多陪發叔
行會成員劉皇發近日受涉嫌漏報買樓及「摸貨」牟利事件影響，心情肯定唔多靚，作為女婿嘅信和集團總經理余漢坤（Randy）又點做呢？Randy尋日出席公司慈善活動時就為外父講好說話，話發叔咁多公司同下屬，未必知得晒所有嘢，但事發後已加強同秘書溝通，又話發叔向公眾道歉後心情平復咗，佢作為女婿會抽多啲時間陪吓發叔喎！
信和集團同小童群益會尋日喺荃新天地舉行越野慈善賽，比賽攀石牆同踩單車。自細喺大澳長大嘅Randy，原來踩單車好叻，佢話屋企以前喺大澳經營米舖，細細個放學後會幫手踩單車送米，一日送兩次，每次送二十斤。不過，Randy話依家年紀開始大，腳部肌肉和關節大不如前，所以希望抽多啲時間做運動操番fit啲。
Randy除咗踩單車外，滑雪一樣得。原來佢八二年喺英國已學識滑雪，近年集中到日本及韓國滑雪，但三年前兒子出世後已暫停呢項運動，所以佢好期待兒子足四歲、骨骼強健後，兩仔爺一齊去滑雪。