政情：申亞網站延長諮詢冇Update
民政事務局局長曾德成前日宣布延長申辦二○二三年亞運會嘅諮詢期，由原先六個星期加碼到十個星期，至十二月五日。但尋日我哋上去申亞諮詢網頁睇過，延長諮詢期呢個咁重要嘅消息，竟然無登出嚟；見微知著，今次特區政府有幾大誠意申亞，大家可想而知啦！
信口開河呃唔到人
自從上月底公布辦亞運要花成四百億元後，輿論一面倒鬧爆，浪費公帑、諮詢期太短之聲不絕於耳，連立法會多個大黨派都向申亞說不，包括建制派大黨民建聯，德成局長前日急補鑊，宣布延長諮詢期。不過只係咁又點夠，各大黨派都話僅延長諮詢，並無動搖佢哋嘅反對立場。
尋日我哋上申亞諮詢網頁睇過，唔少網民亦覺得延長諮詢無用，繼續質疑申亞決定。不過奇怪嘅係，網站根本無登到延長諮詢嘅消息。最新消息一欄中，「最新」嘅只係德成局長上月廿四日就申亞接受訪問嘅紀錄。既然有咁重要嘅消息，理應拿拿臨公告天下，咁懶得去Update，難怪市民唔信任特區政府啦。好似十年前申亞時，政府夠應承過會起好多體育設施，結果咪又係無疾而終，今次只係提供另一個憑證啫！