政情：大輝劈炮放生甘威？

猶記得去年十月甘威捲入怒炒「有好感」女助理事件，全城轟動，政界人人見水就抽，信誓旦旦話要成立調查委員會，聲討甘威。不過喺民主派集體杯葛下，加上加入委員會嘅工作量相當高，最後竟然要東拉西扯，先勉強湊夠腳成立。委員會依家成立咗差唔多一年，但調查進度仲慢過蝸牛，事關原告至今都唔肯出嚟作證。喺「有被告冇原告」嘅情況下，試問又可以點查呢？

最近政圈就有風聲，指向來百足咁多爪嘅林大輝因為公職纏身，成日呻好多嘢做，所以有意申請退出甘威調查委員會。大輝既要兼顧廠商會同議員工作，又擔任自己牽頭成立嘅地區組織「Ｃ18」召集人，出任監警會副主席嘅佢，早前更被揭缺席咗足足一半會議，可見大輝嘅工作量確係多到有啲應付唔到。

其實大輝嘅正職點講都係立法會議員，市民選佢出嚟都係想佢處理多啲議會事務；如果佢為咗「兼職」放棄正職，連甘威調查都半途而廢，就點都講唔過去。另外，既然明知自己唔夠時間用，當初點解又要加入個調查委員會呢？

半途而廢 隨時一拍兩散

現時個委員會只係啱啱夠《議事規則》要求嘅最低組成人數，一旦大輝退出，委員會要即刻進行重選，睇吓有冇新委員加入。由於委員會已經傳召咗咁多證人，即使好彩搵到人入去，調查使唔使重新嚟過呢？即使唔使從頭嚟過，最後出嚟嘅報告又會唔會畀人挑戰？如果搵唔到人接呢個爛攤子嘅話，呢個本已無甚進展嘅委員會，隨時焗住一拍兩散！

心水清嘅人應該記得，早喺甘威女助理風波被揭發時，大輝已幫過甘威解圍，話男士純粹向女士「表示傾慕」唔係罪，只要唔涉及鹹豬手或越軌不忠，其他人唔應該說三道四。莫非大輝今次有心藉自己引退，放生甘威？