中環出更：李大壯潮戴手帶求平衡
卓妮近排喺社交圈發現咗樣新奇潮物，佢係一條印住白色Grounded字樣嘅黑色膠手帶，據講可以令到個人平衡感好啲。本月初卓妮見莊士集團太子爺莊家彬（Albert）戴住出席酒會，上星期見香港台灣商貿合作委員會主席李大壯（David）都戴咗條，細問之下，原來條手帶大有來頭。
David話畀卓妮聽，「Grounded」係手帶牌子，據聞係某已故全國政協副主席嘅楊姓外孫代理入口。佢唔知手帶價值幾多，因為係一位高爾夫球波友送畀佢，目的係令佢龐大嘅身軀平衡啲。原來手帶奧秘係底面嘅芯片，全靠佢發揮神奇功效。David講到興起，仲即場示範單腳企，佢話戴咗手帶後，就算畀人推都唔跌，又好認真咁叫卓妮試吓，場面搞笑。
卓妮又同Albert傾過，咁啱佢嗰手帶都係朋友送嘅，Albert都話可以令到個人身體平衡啲。卓妮近排忙到身心有些少唔平衡，唔知啱唔啱戴呢？
