政情：慘案家屬仲未求助律師會
馬尼拉「8‧23慘案」發生咗之後，律師會成立熱線畀受害人同家屬查詢，但至今都未有收到家屬求助。律師會會長王桂壎尋日話，可能家屬啱啱處理完死者身後事，未必有時間咁快處理民事索償問題，可以理解，但律師會已經初步做咗研究，家屬有機會循民事提出控告對方疏忽，不過根據當地律師嘅講法，呢單嘢最少搞三五七年。
王桂壎話，根據居港菲律賓執業律師提供嘅資料同律師會嘅研究，當地法例只容許家屬控告馬尼拉地方政府官員，好似市長林雯洛同副市長咁，但中央官員代表國家，一般來講唔可以告，除非涉及嚴重疏忽或者欺詐，但佢哋又可以有豁免權。
至於賠償金額方面，王桂壎話當地法例列明民事侵權導致有人死，就要賠一千美元，而法官另外仲可以判一個懲罰性賠償，但佢問過今次事件家屬大約可以索償到幾多錢，就無菲律賓同行答到佢嘞。