政情：周一鑊又放長假！
唔知大家記唔記得，菲律賓人質慘劇發生後，人稱「周一鑊」嘅食物及衞生局局長周一嶽竟然走去放假，搞到要副局長梁卓偉頂硬上，負責統籌傷者喺醫療方面嘅善後工作。周一鑊放完假冇幾耐，尋日起又開始放假，仲一直放到今個月廿七日，即係話又要梁卓偉頂佢個位喇。
早前我哋喺中環置地廣場撞到周一鑊，見佢急急腳往政府總部方向行去，原來佢啱啱開完會，正趕返辦公室繼續做嘢。問佢近排有乜搞，佢話手頭上好多嘢要跟，所以唔敢隨便行開喎。
局長講到自己咁忙，但話口未完又放假去矣，似乎有啲矛盾喎。猶記得當日發生菲律賓人質事件後，佢堅持繼續休假，復工後第一日至急急腳去醫院探望Jason；唔知今次放完假後，又準備做啲乜呢？