政情：棠哥擬披甲爭超級議席
二○一二年立法會選舉區議會功能界別「超級議席」令選舉遊戲規則出現變化，坐擁三十五萬名會員嘅工聯會搶閘研究變陣，會長鄭耀棠尋日透露，唔排除落場競逐由全港一個大選區嘅「超級議席」，再以「一帶五」形式，催谷工聯喺五區直選選情，仲表明一定派人參選九龍西，與同票源嘅民建聯同西九動力梁美芬拗手瓜，建制派喺九龍西戰況隨時比○八年更混亂。
工聯會兩巨頭棠哥同立法會黨團召集人黃國健（ＫＫ）尋日喺新設嘅政務委員會「分部」同傳媒茶敍，再次推銷佢哋倡議嘅立法會直選由五區變四區方案，仲喺已提交政府嘅建議書中，對「表兄弟」民建聯提出嘅六區方案大肆鞭撻，指選區分拆太多，易由大黨把持，形成像台灣藍綠兩大陣營之爭，兩極分裂。可惜吖，政府內部敲定直選維持五區，工聯嗌破喉嚨都無用，所以方案難有吸引力。
被問到工聯係咪派人選「超級議席」，棠哥話，外傳參選大熱陳婉嫻至今未首肯出征，但工聯內部又強烈要求，一二年除固守兩個勞工界議席外，仲要玩直選「５+１」，即係五大區同超級議席都要派人參選，工聯已去信屬會喺十月底前舉薦人選，而棠哥本人亦唔排除披甲上陣參選超級議席。外界本來傳嫻姐出戰，工聯突然考慮變陣，由一向閒雲野鶴咁款嘅棠哥出征，都幾令人跌眼鏡，亦令呢場「超級選舉」更為鬧哄哄。
磨拳擦掌 擴展版圖
參選超級議席，要先成為民選區議員，棠哥唔肯透露「疑似」參選選區，但就話工聯支持者「睇招牌埋位」，會長出戰超級議席，有更強凝聚力，又可帶起工聯喺直選五區嘅氣勢咁話，總之一副磨拳擦掌嘅樣子。此外，現時勞工界嘅葉偉明勢轉戰新界東，潘佩璆轉戰港島則有難度，棠哥尋日話，本身係聯合醫院精神科顧問醫生嘅潘轉戰醫學界，絕對唔係無可能，嘩，工聯果然雄心勃勃，唔放過任何搶位機會。不過，工聯會現時只有ＫＫ同王國興兩名直選議員，一下子要擴闊版圖至「５+１」，戰績如何，真係要選過至知。