中環耳目：劉江華飲貴價水保健
水務署經常賣花讚花香，話本港自來水質素高，但始終未能取悅立法會議員劉江華。點解咁講？因為唔知幾時開始，劉江華屋企已經無煲水飲，長期訂購樽裝水，牌子就係享譽全球嘅「FIJI Water」天然礦泉水，佢大讚呢隻水嘅酸鹼度適中，比較適合佢體質。梗係啦，五百毫升樽裝約售十四元，貴過電油一倍，可謂滴滴甘露，劉議員認真識享受！
口感柔和順滑
劉江華同卓妮講，呢隻礦泉水佢飲咗一、兩年，係佢一手發掘返嚟，雖然飲落口感同其他礦泉水差唔多，但感覺良好，覺得健康好多。但價錢唔平喎？劉江華就咁答：「健康無價嘛。」當然仲要畀得起至得囉。
FIJI Water係來自斐濟群島天然自流水水源，水源經過火山岩層數百年天然過濾，一直喺地球深層並受到多層黏土和岩石保護，保存咗豐富二氧化矽、鈣和鎂等礦物質，令FIJI Water口感倍加柔和順滑，加上FIJI Water處於地球深層地下水層中，喺清潔和密封嘅環境中直接吸取入樽，無接觸外界物質，所以成為最純淨嘅世界頂級樽裝水。
劉江華一向好識養生，飲用頂級天然水之餘，仲有做運動。卓妮有日遇見佢食完晏行返政府總部西座議員辦事處幫助消化。