中環出更：超盈蒲中環同家姐撞到正

何家淑女差唔多個個都係新聞女王，除咗拍拖消息之外，各房嘅姊妹關係亦不時成為傳媒嘅追訪目標。上星期二（八月卅一日），賭王四房長女超盈趁港大開學前，特登喺傍晚時分出嚟中環鬆一鬆，短短一個鐘，佢喺中環就撞到大房同三房嘅家姐，大家仲有講有笑。各房關係咁融洽，賭王認真有福氣！
超盈（右）同Carmen好friend，喺Cafe Landmark一齊high tea時有傾有講。 （黃耀勤攝）
超盈（右）同Carmen好friend，喺Cafe Landmark一齊high tea時有傾有講。 （黃耀勤攝）

今年入讀港大語文系嘅何超盈，開學前特登約埋英國同學、柯清輝契女Carmen仲有Carmen媽咪嚴玉麟夫人，與另一auntie喺Cafe Landmark一齊high tea，飲咗無耐，超盈同Carmen率先離座，孖住行去隔籬中建大廈嘅HMV，買咗個二千零九十九蚊嘅美國Beats by Dr. dre solo耳筒。

超盈做事向來有計劃，呢幾年搵學校搵暑期工都係靠自己，今年九月一日正式返港大嘅佢，猛咁話緊張，所以佢買完嘢，就拿拿臨返屋企為翌日開學做準備。勢估唔到等車期間，居然又畀佢撞到大房家姐何超賢，超賢咁啱同仔女路過，見到喺置地門口等緊車嘅超盈，兩姊妹即時打個招呼，超盈仲同姨甥仔嚟個good bye kiss，相當親切。

有慈善團體募捐，超盈（中）同Carmen（右）都義不容辭掏荷包。
  • 有慈善團體募捐，超盈（中）同Carmen（右）都義不容辭掏荷包。

幫口否認超雲戀林峯

過咗一陣，三房嘅超雲喺置地行完Miu Miu出嚟，一見到超盈，就笑笑口打招呼，兩姊妹有講有笑齊齊等車。最近超雲被傳同藝人林峯拍拖，超盈幫口代家姐伸冤，澄清超雲嘅公司只係喺林峯新戲投資賣廣告，兩人唔係拍拖。超雲亦解釋話，自己只係贊助商，加上依家工作忙，根本無時間拍拖喎，總之單身係喇！

講開又講，超盈話爸爸賭王身體愈來愈好，胃口好之餘仲嗌悶，成日要出街行吓，所以佢哋一得閒就陪爸爸出街食飯輕鬆吓。

超盈（左三）買完新耳筒，急不及待試用，舊耳筒就摺埋放入手袋。
  • 超盈（左三）買完新耳筒，急不及待試用，舊耳筒就摺埋放入手袋。
轉個頭，超盈（背向鏡頭者）又見到大房家姐超賢（左二）一家人，大家雞啄唔斷。 （陳嘉順攝）
  • 轉個頭，超盈（背向鏡頭者）又見到大房家姐超賢（左二）一家人，大家雞啄唔斷。 （陳嘉順攝）
臨走前，仲要撞到三房家姐超雲（戴頭箍者），兩姊妹傾到車嚟先分手。
  • 臨走前，仲要撞到三房家姐超雲（戴頭箍者），兩姊妹傾到車嚟先分手。

卓妮

Money18新功能「18好路數」為你預測心水股票升跌機會率