中環出更：飲宴夾爆手指 肥亨索償?
包括G2000老闆兼自由黨常委田北辰、德昌電機主席汪穗中、偉易達主席黃子欣、富士攝影器材主席孫大倫（Dennis）及婦科名醫陳煥堂嘅「五虎將」星期日齊齊喺君悅開生日派對，點知去飲嘅中策集團主席馬時亨喺宴會上受傷見紅，好彩個宴會專業人士雲集，醫生、律師都嚟幫忙。
金刀梁自薦作證
肥亨係喺宴會上不慎畀張櫈夾親。佢憶述受傷經過話，當坐低食飯時，順手拉一拉張木櫈，點知中指「攝」住咗唔郁得，原來係畀木椅嘅罅隙卡住，肥亨用力一扯，中指就損咗，血流如注，都唔知應唔應該去醫院。
喺現場嘅行政會議成員兼名醫梁智鴻見狀，衝上前為肥亨止血，在場嘅仲有著名心臟科醫生陳紀永，幸好肥亨傷勢唔嚴重，不必縫針，但醫生們要佢豎起中指半粒鐘，否則難以止血，就算不雅都冇辦法。佢身邊嘅朋友起哄，話肥亨可以向酒店索償，律師朋友磨拳擦掌話幫手，兩位醫生亦搞鬼哋補多一句話：「我哋可以做你嘅專家證人！」肥亨翌日已無大礙，亦不必再豎起中指做人，不過醫生話隻手指仍然要包住兩個禮拜，唔准亂郁。