中環耳目：黃靜文推介「開心」法菜
政制及內地事務局副局長黃靜文（Adeline）鍾意四圍試菜，特別鍾情法國菜。最近佢由中環摸到去灣仔軒尼詩道，發掘到256號22樓間Amuse Bouche法國餐廳。餐廳大廚曾經喺港島香格里拉酒店間米芝蓮二星級法國餐廳Petrus工作多年，質素有保證，難怪Adeline食過翻尋味，近半年已食過兩次晚餐，早前又再去午膳，認真識歎。
透露AO食神存在
「Amuse Bouche」呢個法文名意思係令客人嘴巴開心，簡單啲即係令客人食得開心啦。Adeline大讚餐廳食物出色之餘，環境氣氛同招呼都好好，當日佢就叫咗個豐富午餐，前菜選咗番茄芝士沙律及番茄鮮蝦湯，主菜就選烤焗三文魚扒配雜菜天婦羅，做得相當出色。
Adeline係高官入邊嘅單身貴族，平時鍾意打高球，原來仲咁識食，莫非以前跟隨前政務司司長「肥龍」許仕仁期間學番嚟？非也，佢話只係自己鍾意試新菜式啫！Adeline透露，運輸及房屋局內有個「ＡＯ（政務官）食神」，經常發掘新餐廳介紹畀同事，但佢無透露係邊個；卓妮八過，呢個人就係該局嘅首席助理秘書長馮建業（Eugene），即係幫手推「九招十二式」規管發展商賣樓嗰位高官，卓妮有機會都要請教吓佢至得！
卓妮