中環出更：朱繼陶係Ferragamo超級貴賓
香港鐘錶業總會主席、太子珠寶執行董事朱繼陶（Joseph）日前出席職業訓練局周年酒會，卓妮見佢戴咗條黃色靚呔，上面滿布小巧可愛嘅動物，顏色輕柔顯眼，細問之下原來係意大利名牌Salvatore Ferragamo嘅傑作。Joseph笑謂，條呔係自己揀嘅。佢已幫襯好多年，依家係享有七折優惠嘅超級貴賓添！
Joseph投身珠寶鐘錶業廿幾年，卓妮幾時見佢都咁精神爽利。佢話西裝、領呔都係自己買嘅，除咗Ferragamo靚呔外，卓妮見佢件恤衫都好特別，佢話由於近年身形膨脹，所以恤衫係搵尖沙咀一位上海師傅訂做。
當日Joseph特登去為職訓局旗下香港知專設計學院打氣，事關本港鐘錶業有唔少自創品牌，身為主席嘅Joseph梗要撐本地創作！咁太子珠寶會唔會打算自創牌子？Joseph聽罷即刻耍手擰頭，話做品牌太辛苦喇！