中環出更：大學校長熱話世盃
世界盃進入十六強淘汰賽後，氣氛立即升溫。除咗打工仔、學生哥追睇世界盃，科大校長陳繁昌都開電視追波睇，熱捧阿根廷同巴西隊；但港大校長徐立之就因校長官邸冇「有線」，想睇都唔得。
尋日連場暴雨，但沙田馬場馬照跑。陳繁昌、徐立之及理大校長唐偉章，冒住橫風橫雨入場，為「香港賽馬會社群盃」打氣。幾位校長對刨馬興趣唔大，講起世界盃，陳繁昌就精神晒，佢自爆讀中學時係波牛一名，呢排世界盃踢到如火如荼，佢都追埋一份。南韓隊喺十六強止步，但拚搏表現令佢感動。講到心水強隊，佢貼阿根廷同巴西，單睇攻勢同腳法，就足以拍爛手掌。
陳校長講波，徐立之就企埋一邊唔插嘴。原來港大校長官邸冇裝「有線」，想睇都冇份。唐偉章都話對世界盃興趣唔大，還是覺得踩單車最好玩。
金刀梁畀人鬧好開心
香港人對英格蘭隊有情意結，尋晚英格蘭決戰德國，骨科名醫高永文都話擔定櫈仔睇好戲，估唔到高永文都被俊朗球星吸引，佢話最欣賞葡萄牙同西班牙隊，球員喺球場上我行我素，型格十足喎。
同場仲有行政會議成員梁智鴻，佢話不時有人質疑佢係咪長者，早前去瑞士旅行，仲有外籍女子唔客氣咁話佢「後生仔」（young man）唔識尊重長者添。佢被人鬧後反而好開心，因為佢年過七十，仲有人叫佢「young man」！
卓妮