立法會議員涂謹申講嘢連珠炮發，速度驚人，估唔到開餐都快過人，啃一個快餐，十分鐘搞掂。卓妮早前路過灣仔譚臣道，撞見阿涂揸住座駕搵位泊車，嗰陣係晏晝兩點幾，阿涂醒目地泊好車後，就以九秒九速度快步走。阿涂揀咗一間最就腳嘅茶餐廳坐低，原來係兩點幾至食晏。碟飯一上枱，佢就狼吞虎嚥，十分鐘清晒碟。卓妮上前打招呼，阿涂笑騎騎為食相解畫：「無法喇，趕住兩點半返立法會開會，咪食快餐囉！」
