政情：陳維安撐子讀國際校
呢幾年教育改革搞到唔少學生同家長怨聲載道，教育局副局長陳維安（Kenneth）尋日出席樹仁大學學生講座嗰陣，就畀學生圍攻，批評佢安排兩個仔入讀國際學校，等如唔認同本土教育，連做官嘅都咁，叫一般家長點放心。唔止一次畀人質疑嘅Kenneth就話，爸爸嘅政治生涯唔應該影響個仔嘅學習，力撐囝囝繼續讀國際學校。
Kenneth好坦白咁話，佢確實好認同國際學校嘅教學方針，學生自由啲，少啲背書，多啲創意，十幾年前佢幫大仔揀學校嗰陣，教改先啱啱開始，當時社會上仲有好多爭議，亦有唔少人質疑係咪真係可以做到「求學不是求分數」，時至今日，學校已經趨向國際學校講創意、思考嘅教學方法，但無理由佢兩年前轉工入政府，就要個仔轉校。
講完呢筆，班學生又話，樹仁大學課室同宿舍都唔夠，政府都未幫手搞掂，又話要整多幾間私立大學出嚟，遲早搞到大學生氾濫。Kenneth就話，唔係話支持開新校就等如唔理啲現有院校，叫同學大可放心，政府會繼續同區議會商討樹仁擴建嘅事。總之無論搓圓定㩒扁，佢都總有個理由。